रावेर:
अनुसूचित जातीच्या आरक्षणातील उपवर्गीकरणाच्या प्रस्तावाविरोधात रावेर शहरात समाजबांधवांचा तीव्र संताप पाहायला मिळाला. या अन्यायकारक प्रस्तावाचा निषेध करण्यासाठी आणि विविध प्रलंबित मागण्यांसाठी 'अनुसूचित जाती आरक्षण उपवर्गीकरण विरोधी मोर्चा कृती समिती'च्या वतीने रावेर तहसील कार्यालयावर एक अभूतपूर्व आणि विराट मोर्चा काढण्यात आला. मोर्चाच्या शेवटी तहसीलदार दीपा जेढे यांना मागण्यांचे सविस्तर निवेदन सादर करून शासनाचा तीव्र निषेध नोंदवण्यात आला.
छोरीया मार्केटपासून रणशिंग फुंकले!
रावेर शहरातील छोरीया मार्केट येथून या भव्य मोर्चाची सुरुवात झाली. मोर्चात अबालवृद्धांसह महिला, तरुण-तरुणी, नागरिक आणि विविध सामाजिक संघटनांचे कार्यकर्ते व पदाधिकारी प्रचंड संख्येने रस्त्यावर उतरले होते. आंदोलनकर्त्यांच्या हातात मागण्यांचे फलक झळकत होते. संपूर्ण रावेर शहर 'जय भीम'च्या आसमंत भेदणाऱ्या घोषणांनी दुमदुमून गेले होते. "आरक्षणातील उपवर्गीकरणाचा जाचक प्रस्ताव शासनाने तातडीने मागे घ्यावा," अशी एकच एक घणाघाती मागणी यावेळी सर्व स्तरांतून करण्यात आली.
संविधानिक हक्कांवर गदा आणू नका: वक्त्यांचा इशारा
या ऐतिहासिक मोर्चाच्या माध्यमातून समाजबांधवांनी आपली ताकद दाखवून दिली. "अनुसूचित जातींच्या आरक्षणाचे संविधानिक संरक्षण कोणत्याही परिस्थितीत अबाधित राहिलेच पाहिजे. आरक्षणाच्या मूळ हक्काला धक्का लावण्याचा प्रयत्न खपवून घेतला जाणार नाही," असा इशारा उपस्थित नेत्यांनी दिला. मोर्चादरम्यान विविध विचारवंत आणि सामाजिक कार्यकर्त्यांनी उपस्थित जनसमुदायाला मार्गदर्शन केले. त्यांनी आरक्षणाचे महत्त्व, संविधानाने दिलेले अधिकार आणि सामाजिक न्यायाच्या लढ्याची पुढील दिशा यावर परखड विचार मांडले.मोठ्या नेत्यांसह समाजबांधवांची अथांग गर्दी
या भव्य आंदोलनात आनंद बाविस्कर, दिलीप कांबळे, उमेश गाढे, प्रदीप सपकाळे, ॲड. योगेश गजरे, संघरक्षक तायडे, नगरसेवक पिंटू वाघ, प्रशांत गाढे, निलेश नन्नवरे, बाळू शिरतुरे, आत्माराम तायडे, मनोहर तायडे, सावंत मेढे, महेश तायडे, विजय भोसले, ॲड. दीपक तायडे, विजय अवसरमल, विनोद मोरे, महेंद्र कोचुरे, राजेंद्र काळे, साहेबराव वानखेडे, रवी तायडे, ॲड. आनंद वाघोदे, संघरत्न दामोदर, सदाशिव निकम, रवींद्र रायपुरे, राहुल गाढे, चांगो भालेराव यांच्यासह जिल्ह्यातील हजारो समाजबांधव आपल्या हक्कासाठी खांद्याला खांदा लावून सहभागी झाले होते.
कोणत्याही टिप्पण्या नाहीत:
टिप्पणी पोस्ट करा