पेपरफुटीच्या विरोधात जंतरमंतरवर विद्यार्थ्यांचा एल्गार; 'चलो संसद' मार्च दरम्यान दिल्लीत पोलिसांचा लाठीचार्ज

विशेष प्रतिनिधी 

        देशातील पेपरफुटी आणि शिक्षण व्यवस्थेतील कथित भ्रष्टाचाराच्या विरोधात आज राजधानी दिल्लीतील जंतरमंतर येथे हजारो विद्यार्थ्यांनी उग्र आंदोलन केले. 'कॉकरोच जनता पार्टी' (CJP) आणि विविध विद्यार्थी संघटनांच्या नेतृत्वाखाली आज चलो ससंसद मार्चचे आयोजन करण्यात आले होते. संसदेचे पावसाळी अधिवेशन सुरू असतानाच झालेल्या या आंदोलनामुळे ल्युटियन्स दिल्लीत प्रचंड तणावाचे वातावरण निर्माण झाले. आंदोलकांना पांगवण्यासाठी पोलिसांनी केलेल्या लाठीचार्ज आणि अश्रुधुराच्या वापरामुळे जंतरमंतरला छावणीचे स्वरूप आले होते.

संसदेचे मुख्य गेट बंद, मेट्रो स्थानके ठप्प

        सकाळी ९ वाजल्यापासूनच देशभरातील हजारो विद्यार्थी जंतरमंतरवर गोळा झाले होते. केंद्रीय शिक्षण मंत्री धर्मेंद्र प्रधान यांच्या राजीनाम्याची मागणी करत आंदोलकांनी संसदेच्या दिशेने कूच करण्याचा प्रयत्न केला. पोलिसांनी सुरक्षेसाठी लावलेले तीन स्तरांचे बॅरिकेड्स आंदोलकांनी तोडल्यानंतर पोलिसांनी बळाचा वापर केला. रॅपिड ॲक्शन फोर्स (RAF) आणि दिल्ली पोलिसांनी आंदोलकांवर जोरदार लाठीचार्ज केला आणि अश्रुधुराच्या नळकांड्या फोडल्या. यामध्ये काही विद्यार्थी आणि पत्रकार जखमी झाले. काही आंदोलक संसदेच्या अत्यंत जवळ पोहोचल्याने सुरक्षा यंत्रणांनी खबरदारी म्हणून संसद भवनाचे मुख्य प्रवेशद्वार काही काळ बंद केले होते. सुरक्षेसाठी केंद्रीय सचिवालय आणि राजीव चौक यांसह ५ प्रमुख मेट्रो स्थानके देखील तात्पुरती बंद करण्यात आली होती.

सोनम वांगचुक यांचा रुग्णालयातूनच पाठिंबा

गेल्या २० दिवसांपासून जंतरमंतरवर आमरण उपोषणाला बसलेले लडाखचे पर्यावरण कार्यकर्ते सोनम वांगचुक यांना दोन दिवसांपूर्वी पोलिसांनी तब्येत बिघडल्याने सफदरजंग रुग्णालयात दाखल केले होते. त्यांनी आज रुग्णालयातूनच प्रशासनाला पत्र लिहून आंदोलनात सहभागी होण्यासाठी तात्पुरती सुटका करण्याची मागणी केली. दरम्यान, खासदार महुआ मोईत्रा, आप नेते मनीष सिसोदिया आणि अभिनेते प्रकाश राज यांनी जंतरमंतरवर जाऊन विद्यार्थ्यांच्या या आंदोलनाला प्रत्यक्ष भेट देऊन जाहीर पाठिंबा दर्शवला.

चर्चा सुरू, संसद मार्च तात्पुरता स्थगित

आंदोलन अधिक चिघळत असल्याचे पाहून दुपारनंतर राजकीय हालचालींना वेग आला. CJP चे संस्थापक अभिजीत दिपके आणि त्यांच्या विद्यार्थी शिष्टमंडळाने भाजप अध्यक्ष जे. पी. नड्डा यांची भेट घेतली. सरकारने विद्यार्थ्यांच्या मागण्यांवर सकारात्मक चर्चा करण्याचे आश्वासन दिल्यानंतर संघटनांनी आपला आजचा संसद मार्च तात्पुरता स्थगित केला. मात्र, मागण्या मान्य न झाल्यास आंदोलन अधिक तीव्र करण्याचा इशारा विद्यार्थ्यांनी दिला आहे. सध्या जंतरमंतर परिसर पोलिसांनी पूर्णपणे रिकामा केला असून दिल्लीत कडक सुरक्षा व्यवस्था तैनात आहे.